ନୂଆଦିଲ୍ଲୀ, ୨୮/୨ : ଭାରତ ବନାମ ପାକିସ୍ତାନ ମୁକାବିଲା ଦେଖିବାକୁ ଖେଳପ୍ରେମୀଙ୍କ ଗହଣରେ ପ୍ରବଳ ଉତ୍ସାହ ଦେଖିବାକୁ ମିଳେ । ନିକଟରେ ଚାମ୍ପିଅନ୍ସ ଟ୍ରଫି-୨୦୨୫ରେ ଭାରତ ଏବଂ ପାକିସ୍ତାନ ମଧ୍ୟରେ ହାଇ ଭୋଲଟେଜ୍ ମ୍ୟାଚ୍ ହୋଇଥିଲା । କିନ୍ତୁ ଏହି ମ୍ୟାଚ୍ରେ ଭାରତୀୟ କ୍ରିକେଟ ଦଳ ବିଜୟୀ ହୋଇଥିଲା । ସେପଟେ ପାକିସ୍ତାନ ଶୋଚନୀୟ ପରାଜୟ ଭୋଗିବା ସହ ଚାମ୍ପିଅନ୍ସ ଟ୍ରଫିରୁ ବିଦା ହୋଇଛି । ତେବେ ଭାରତ ବନାମ ପାକିସ୍ତାନ ମ୍ୟାଚ୍ ପୁଣି କେବେ ହେବେ ତା ଉପରେ ସମସ୍ତଙ୍କ ନଜର ରହିଛି । ଏହାରି ଭିତରେ ଖେଳପ୍ରେମୀଙ୍କ ପାଇଁ ଖୁସି ଖବର ଆସିଛି । ଚଳିତ ବର୍ଷ ଭାରତ ଏବଂ ପାକିସ୍ତାନ ଦଳ ମଧ୍ୟରେ ଆଉ ୩ଟି ମ୍ୟାଚ୍ ହୋଇପାରେ । ଏସିଆ କପ୍ ୨୦୨୫ ଚଳିତ ବର୍ଷ ସେପ୍େଟମ୍ବରରେ ଅନୁଷ୍ଠିତ ହେବ । ୨୦୨୫ ଏସିଆ କପରେ ମୋଟ ୧୯ଟି ମ୍ୟାଚ୍ ଖେଳାଯିବ । ଟୁର୍ଣ୍ଣାମେଣ୍ଟ ସେପ୍େଟମ୍ବର ଦ୍ୱିତୀୟ ସପ୍ତାହରେ ଆରମ୍ଭ ହୋଇପାରେ । ଏହାର ଆନୁଷ୍ଠାନିକ କାର୍ଯ୍ୟସୂଚୀ ଏପର୍ଯ୍ୟନ୍ତ ଆସିନାହିଁ । ଏସିଆ କପରେ ମୋଟ ୮ଟି ଦଳ ଖେଳିବେ । ଆୟୋଜକ ଭାରତ ଏବଂ ପାକିସ୍ତାନ ଗ୍ରୁପ୍ ଇ ରେ ଅନ୍ତର୍ଭୁକ୍ତ। ଦୁଇ ଦଳ ମଧ୍ୟରେ ଗ୍ରୁପ୍ ପର୍ଯ୍ୟାୟ ମ୍ୟାଚ୍ ପରେ, ଦଳଗୁଡ଼ିକ ଏହି ଟୁର୍ଣ୍ଣାମେଣ୍ଟରେ ଆଉ ଦୁଇଟି ମ୍ୟାଚ୍ ଖେଳିପାରିବେ । ଏସିଆ କପ୍ ୨୦୨୫ରେ, ଭାରତ ଏବଂ ପାକିସ୍ତାନ ମଧ୍ୟରେ ଗୋଟିଏ ମ୍ୟାଚ୍ ନିଶ୍ଚିତ । କାରଣ ଉଭୟ ଦଳ ଗୋଟିଏ ଗ୍ରୁପରେ ଅଛନ୍ତି । ଏହା ପରେ ଉଭୟ ଗ୍ରୁପର ଶ୍ରେଷ୍ଠ ୨ ଦଳ ସୁପର ୪ରେ ମୁକାବିଲା କରିବେ। ଏଥିରେ ମଧ୍ୟ ଭାରତ ଏବଂ ପାକିସ୍ତାନ ମୁହାଁମୁହିଁ ହୋଇପାରନ୍ତି । ଯଦି ଉଭୟ ଦଳ ଫାଇନାଲରେ ପହଞ୍ଚନ୍ତି ତେବେ ଭାରତ ଏବଂ ପାକିସ୍ତାନ ମଧ୍ୟରେ ଟାଇଟଲ ମୁକାବିଲା ଦେଖିବାକୁ ମିଳିପାରେ । ଭାରତ ୨୦୨୫ ଏସିଆ କପର ଆୟୋଜକ । କିନ୍ତୁ କ୍ରିକବଜ୍ ରିପୋର୍ଟ ଅନୁଯାୟୀ, ଏହି ଟୁର୍ଣ୍ଣାମେଣ୍ଟ ଭାରତ ବାହାରେ ଅନୁଷ୍ଠିତ ହୋଇପାରେ । ଭାରତ ଏବଂ ପାକିସ୍ତାନ ମଧ୍ୟରେ ତିକ୍ତସମ୍ପର୍କ ଯୋଗୁଁ ଦେଶ ବାହାରେ ଟୁର୍ଣ୍ଣାମେଣ୍ଟ ଆୟୋଜନ ହୋଇପାରେ ବୋଲି କୁହାଯାଉଛି । ଏସିଆ କପ୍ ୨୦୨୫ ଶ୍ରୀଲଙ୍କା ଏବଂ ଟଇଋରେ ଆୟୋଜିତ ହୋଇପାରେ । ଏହି ଟୁର୍ଣ୍ଣାମେଣ୍ଟରେ ଭାରତ ଏବଂ ପାକିସ୍ତାନ ବ୍ୟତୀତ ବାଂଲାଦେଶ, ଶ୍ରୀଲଙ୍କା, ଆଫଗାନିସ୍ତାନ, ୟୁଏଇ, ଓମାନ ଏବଂ ହଂକଂ ଅଂଶଗ୍ରହଣ କରିବେ । ୨୦୩୧ ସୁଦ୍ଧା ୪ଟି ଏସିଆ କପ୍ ପାଇଁ ସ୍ଥାନ ନିର୍ଣ୍ଣୟ କରାଯାଇଛି । ୨୦୨୭ରେ ବାଂଲାଦେଶ ଆୟୋଜକ ହେବ, ଏହି ସିଜିନରେ ଏସିଆ କପ୍ ଓଡିଆଇ ଫର୍ମାଟରେ ଖେଳାଯିବ । ୨୦୨୯ରେ ପାକିସ୍ତାନ ଆୟୋଜକ ହେବ କିନ୍ତୁ ଏହି ଇଭେଣ୍ଟ ଏକ ନିରପେକ୍ଷ ସ୍ଥାନରେ ଖେଳାଯିବ ଏବଂ ଏହା ଟି୨୦ ଫର୍ମାଟରେ ହେବ। ୨୦୩୧ ମସିହାର ଏସିଆ କପ୍ ଦିନିକିଆ ଫର୍ମାଟରେ ଶ୍ରୀଲଙ୍କାରେ ଅନୁଷ୍ଠିତ ହେବ ।
