ଅନୁଗୁଳ: ଅନୁଗୁଳ ସରକାରୀ ସ୍ୱୟଂଶାସିତ ମହାବିଦ୍ୟାଳୟର ଛାତ୍ରଛାତ୍ରୀମାନେ ସମାଜରେ ପୋଲିସର ଭୂମିକା, ଦାୟିତ୍ୱ ଏବଂ କାର୍ଯ୍ୟପ୍ରଣାଳୀକୁ ନିକଟରୁ ଜାଣିବା ପାଇଁ ଏକ ଶିକ୍ଷାମୂଳକ ପରିଦର୍ଶନ କରିଥିଲେ। ଏହି ଅବସରରେ ସେମାନେ ଗୋପାଳପ୍ରସାଦ ଥାନା ଓ ବଅଁରପାଳର ଶିଶୁ ଅନୁକୂଳ ଥାନାକୁ ଯାଇ ସେଠାରେ ପୋଲିସ ଅଧିକାରୀମାନଙ୍କ ସହ ମିଳିଥିଲେ।
ପରିଦର୍ଶନ ସମୟରେ ଛାତ୍ରଛାତ୍ରୀମାନଙ୍କୁ ଥାନାର କାର୍ଯ୍ୟ ପ୍ରଣାଳୀ, ଅଭିଯୋଗ ଦାଖଲ ପ୍ରକ୍ରିୟା, ଆଇନ-ଶୃଙ୍ଖଳା ରକ୍ଷା ଓ ଜନସାଧାରଣଙ୍କ ସୁରକ୍ଷା ପାଇଁ ପୋଲିସ କିପରି କାମ କରେ ସେ ସମ୍ପର୍କରେ ଅବଗତ କରାଯାଇଥିଲା। ପୋଲିସ ଅଧିକାରୀମାନେ ଛାତ୍ରଛାତ୍ରୀଙ୍କୁ କହିଥିଲେ ଯେ, ପୋଲିସ କେବଳ ଅପରାଧ ନିୟନ୍ତ୍ରଣ ନୁହେଁ, ସମାଜରେ ଶାନ୍ତି, ସୁରକ୍ଷା ଓ ନ୍ୟାୟ ପ୍ରତିଷ୍ଠାରେ ମଧ୍ୟ ଗୁରୁତ୍ୱପୂର୍ଣ୍ଣ ଭୂମିକା ନିଭାଏ।
ବିଶେଷକରି ଶିଶୁ ଅନୁକୂଳ ଥାନା ପରିଦର୍ଶନ ସମୟରେ ଛାତ୍ରଛାତ୍ରୀମାନେ ଶିଶୁ ସୁରକ୍ଷା, ଶିଶୁ ଅଧିକାର ଓ ସମ୍ବେଦନଶୀଳ ମାମଲାରେ ପୋଲିସ କିପରି ସହାନୁଭୂତିଶୀଳ ଭାବେ କାମ କରେ, ସେ ବିଷୟରେ ଜାଣିଥିଲେ। ଏହି ଥାନାର ବିଶେଷ ବ୍ୟବସ୍ଥା ଓ ପରିବେଶ ଛାତ୍ରଛାତ୍ରୀଙ୍କ ଆକର୍ଷଣର କେନ୍ଦ୍ରବିନ୍ଦୁ ହୋଇଥିଲା।
ଏହି ପରିଦର୍ଶନର ମୁଖ୍ୟ ଉଦ୍ଦେଶ୍ୟ ଥିଲା ଛାତ୍ରଛାତ୍ରୀମାନଙ୍କ ମନରୁ ପୋଲିସ ପ୍ରତି ଥିବା ଭୟ ଓ ଦ୍ୱନ୍ଦ୍ୱ ଦୂର କରିବା। ଅନେକ ସମୟରେ ସାଧାରଣ ଲୋକମାନେ ପୋଲିସ ପାଖକୁ ଯିବାରେ ଭୟଭୀତ ହୁଅନ୍ତି, କିନ୍ତୁ ଏହି ପରିଦର୍ଶନ ମାଧ୍ୟମରେ ଛାତ୍ରଛାତ୍ରୀମାନେ ବୁଝିପାରିଥିଲେ ଯେ ପୋଲିସ ସାଧାରଣ ଲୋକଙ୍କ ସହାୟତା ଓ ସୁରକ୍ଷା ପାଇଁ ସଦା ସଜାଗ ଅଛି।
କଲେଜ ପକ୍ଷରୁ କୁହାଯାଇଛି ଯେ, ଏପରି ପ୍ରାୟୋଗିକ ଶିକ୍ଷାମୂଳକ କାର୍ଯ୍ୟକ୍ରମ ଛାତ୍ରଛାତ୍ରୀମାନଙ୍କ ମଧ୍ୟରେ ସଚେତନତା, ସାମାଜିକ ଦାୟିତ୍ୱବୋଧ ଓ ପ୍ରଶାସନିକ ବ୍ୟବସ୍ଥା ପ୍ରତି ଆଗ୍ରହ ବଢ଼ାଇବାରେ ସହାୟକ ହେଉଛି। ଛାତ୍ରଛାତ୍ରୀମାନେ ମଧ୍ୟ ଏହି ପରିଦର୍ଶନକୁ ଏକ ଅନୁଭୂତିମୂଳକ ଶିକ୍ଷା ବୋଲି କହିଥିବା ବେଳେ, ଏହା ତାଙ୍କ ମନରେ ପୋଲିସ ପ୍ରତି ସକାରାତ୍ମକ ଧାରଣା ସୃଷ୍ଟି କରିଥିବା ମତ ପ୍ରକାଶ କରିଥିଲେ।
